WILLEMSTAD, CURAÇAO — Frakshon di Partido Nashonal di Pueblo (PNP) a trese puntonan skèrpi i analítiko na nòmber di pueblo, ayera, 5 di novèmber 2025, durante e reunion di Komishon Sentral tokante e rapòrt devastador di Kontraloria General (ARC). E rapòrt, ku ta konkluí ku e meta pa un kuenta anual aprobá na 2026 “no ta alkansabel” , a keda usá pa frakshon di PNP pa ilustrá e bankarota total di e maneho finansiero di Gobièrnu. 

Parlamentario Sheldry Osepa a kuminsá ku e promé frase di e rapòrt mes: “E promé blachi di e rapòrt… e promé frase ta kuminsá… ‘Pais (Kòrsou) for di su eksistensia na 2010 no a risibí niun deklarashon di aprobashon (goedkeurende verklaring)’.” El a usa e echo akí pa konfirmá ku despues di 15 aña, e fayo di gobièrnu akí ta un echo konstatá pa e órgano di mas altu di kòntròl finansiero. 

Osepa a lansa un punto direkto riba e falta di rèspèt di Gobièrnu pa Parlamento, refiriendo na e derecho di presupuesto komo “un di e poko derechonan ku Parlamento tin.” El a sigui: “Ni e tiki outoridat ei nos no por tuma na serio.” 

Super skèrpi tabata ora el a kuestioná e legalidat di e aktonan di Gobièrnu, puntrando Kontraloria General: “Si bo no kumpli ku lei di kontabilidat, e ta un ‘strafbaar feit’ (echo kastigabel)?” 

Reflehando riba e seriedat di e situashon, Osepa a hasi un komparashon pa pueblo komprondé: “Bo ta kere ku lo bo tabata tin bo propio kompania, bo negoshi, ku nos lo a tolerá e kosnan aki ku ta pasa den nos pais?” 

Lider di Frakshon, Sra. Ruthmilda Larmonie-Cecilia, a duna un análisis profundo di e problema, mustrando ku esaki no ta un simpel fayo, sino un problema fundamental. For di su salida ku e pregunta ku den tempu di Antias nos tabata tin ‘goedkeurende verklaringen’? El a kuestioná si e fayo konstantemente akí ta un “modus operandis” òf un falta real di kapasidat den e aparato. 

“Nos tin un problema fundamental,” Larmonie-Cecilia a enfatisá, “Nos ta konstatá ku ketubai ARC ta splika nos ku nos no ta kumpli… Kiko ta e ‘magic wand’ (staf mágiko) pa pone nos kumpli?” 

Lider di Frakshon di PNP a trese e punto klave ku ta dal den kurason di pueblo: e pèrdida di outoridat moral di gobièrnu. El a trese dilanti: “E ta duna un bista kla ku si abo komo gobièrnu bo no por atendé korektamente ku bo finansa… kon bo ke pa e pueblo… sí kumpli ku di nan?” 

Frakshon di PNP a mustra ku nan a antisipá rib’é problemanan akí i a hasi lo máksimo den nan ròl di kòntròl asta ora tabata n’e otro banda di medaya. Parlamentario Osepa a referí na un moshon di PNP, ku e rapòrt mes ta sita, kaminda PNP a eksigí pa “ki ora ku Gobièrnu bini ku kambio no presupuestá delantá, pa informá Parlamento mensualmente.” E moshon akí no a haña sosten di koalishon (MFK). “P’esei nos konsenshi ta limpi,” Osepa a deklará. 

PNP a konkluí ku e rapòrt di Kontraloria General ta un konfirmashon di loke nan a bini ta bisando: mester sòru pa tur gobièrnu den su tarea prinsipal manehá sèn di pueblo ku integridat i rèspèt. Frakshon di PNP ta eksigí ku mester stòp di trata ku plaka di pueblo manera djis un wega i ku ta tempu pa “responsabilisá kada depchi, kada sodó di e pueblo akí.“

Follow WENSHOW on Facebook, Twitter, Instagram, LinkedIn