Inskripshon pa ‘Koningsspelen’ te ku 9 di aprel próksimo

Willemstad – Skolnan di fundeshi ku ke partisipá na ‘Koningsspelen’ dia 26 di aprel por inskribí te ku djamars 9 di aprel próksimo. Esaki Komishon Nashonal Inougurashon Kòrsou ta duna di konosé. ‘Koningsspelen’ ta den kuadro di inougurashon real di Prens Willem-Alexander i Prinses Máxima dia 30 di aprel próksimo.

Prens Willem-Alexander ta kumpli aña dia 27 di aprel. El a ekspresá e deseo pa organisá un dia deportivo pa tur mucha di skol básiko (skol di fundeshi na Kòrsou). En konekshon ku e deseo aki djabièrnè 26 di aprel skolnan di fundeshi por partisipá na ‘Koningsspelen’. Esaki ta un dia deportivo ku kada skol por organisá su mes aktividatnan pa e alumnonan. Ku e aktividat aki ke trese un laso entre muchanan, mayornan i dosentenan. Prensès Máxima ta habri e ‘Koningsspelen’ riba e islanan den reino pa medio di un transmishon live for di Hulanda.

Tur alumno di e skolnan ku ta partisipá ta haña un desayuno mainta. Skolnan ku ta partisipá ta risibí un bale di 350 florin pa por kumpra material deportivo pa usa durante di ‘Koningsspelen’.

Bishita real
Entre e skolnan di fundeshi ku partisipá ta skohe unu ku ta risibí bishita di Rei Willem-Alexander i Reina Máxima durante nan biahe pa Kòrsou na novèmber próksimo.

Inskripshon
Partisipashon ta kompletamente grátis. Entre tantu mayoria skol di fundeshi a risibí un formulario di inskripshon digital i por inskribí serka Thakaidzwa Doran, kordinadó di ‘Koningsspelen’. Skolnan por manda nan inskripshon mas tardá djamars 9 di aprel pa emailadrès curacaokonginsspelen@hotmail.com. Pa mas informashon por bèl riba number di telefòn 515-2371.