WILLEMSTAD – Entrante 25 di yuli proksimo Teatro Luna Blou ta presenta un siklo spesial di e festival di pelikula “Muestra de Cine del Caribe” dediká na Haití, den selebrashon di e Aña internashonal di Diaspora Afrikano.

 

“Muestra de Cine del Caribe” ta ilustra un festival di dokumentario, “short-films”, dibuhonan anima i pelikulanan ku ta konta e historia i kultura di nos país ruman Haiti.

 

Esaki lo ta e di tres edishon di e festival di sine, ku ta konta su “tour” den mas ku 32 pais den Karibe i Latino Amerika. “Muestra de Cine del Caribe” ta un kreashon di e Instituro Cubano di Arte i Cinematografia di Cuba, i ta konta ku un komite internashonal di selekshon ku tur aña ta skohe entre mas di 217 pelikula ku ta kumpli ke kriteria pa representa Karibe den e programa di e festival di sine den tur e paisnan.

 

Den e komishon selektivo aki ku representantenan di Trinidad & Tobago, Haiti, Cuba i mas, e representante di país Kòrsou ta nos eminensia artistiko, fundadó i direktor di Teatro Luna Blou sr. Norman de Palm.

 

 

Den e edishonnan anterior pelikulanan lokal ku a representa Kòrsou ta “Kore Churandy, Kore” di Dolph van Stapele, “Zulaika, kobra ta duru” di Milushka Birge, “Sin-derella” di Segni Bernardina, tur a pasa den salanan di sine na Colombia, Peru, St. Kitts & Nevis, Trinidad & Tobago, Cayman Islands, Fransia, Brazil, Panama, i mas.

 

“Muestra Caribe” ta habri Karibe den tur su rikesa kultural pa mundu i alabes ta sirbi komo katalisado pa e kreatividat di sineasta den Karibe.

 

E edishon spesial akí dedika na “Haiti” ta konta e realidat di e país, un nashon ku a sufri aña pasá 12 di yanüari 2010 pa un teremoto ku a laga un saldo di mas ku 300 mil morto, i tambe algun suidadano di nos pais.

 

 

“Sr. Benito Derosches representante sosial di e komunidat Haitiano na Kòrsou ta aploudi e inisiativa di e festival i tambe ta hasi un yamada pa asina laga ku e festival aki por toka tur gremio asina un i tur tambe por konose Haiti den tur su diferente aspektonan prome i después di e suseso devastador.”

 

Un kompliashon di pelikulanan lo ser estrena riba e dianan di e festival 25, 26, 28, 30 i 31 di yüli 2011 den nos Teatro Luna Blou. Ta kombida un i tur, tur gran amante di sine, di kultura i arte pa bin konose mas di e kultura Haitiano, i asina traha riba un miho laso den nos komunidat multikultural.

 

Pa mas informashon di e festival aki por tuma kontakto ku Teatro Luna Blou na 462-2209 of na 513-0101. Tambe por akudi riba websitenan www.lunablou.com of www.wen-show.com. I sigi tur desaroyo riba www.facebook.com/teatrolunablou i www.facebook.com/wenshow .