20.07.2011 M’a hasi un promesa na Pais Kòrsou,  mi ta kumpliendo kune?

Mi Pais Kòrsou,

E simpel echo bunita ku mi ta eksperensia esaki den mi bida .. ta hasimi èkstra bendishoná. Markando historia, p’asina mi yunan por mira i siña ki tur nan papa a hasi.

Emoshon ankra na un pasado ta hasi nos humano,

Antia Hulandes sigur a nifiká hopi i lo keda nifiká semper algu pa nos tur.

Pero sigur lo no determiná e futuro briante pa nos pais.

Di tur kos nos a siña, i awor ta tempu pa profundisá i mehorá.

E simia ku mester keda planta awe den kurason di kada Yu di Kòrsou,

Mester ta bon alimentá ku energia i sabiduria pa krese bira un palu saludabel, yen di forsa i vitamina pa sigui traha konhuntamente n’e bienestar general.

E suela riku ku mi a nase ariba ta brindami e oportunidat pa siguí krese i desaroyá.

Kaminda mi lombrishi ta dera, i mi mester ofresé tur ku mi por pa huntu nos yega n’e mihó porvenir personal i general.

P’esei mi ta komprometé mi mes na mi Pais Kòrsou, na nos Pais Kòrsou.

Pais Kòrsou mi ta primintí,

Di traha riba un nashon kaminda un i tur por biba den harmonia i na pas ku otro.

Mi ta primintí di lanta mi bos i kanta e grandesa di Kòrsou, e isla chikí baranka den laman.

Kòrsou mi ta primintí di  ta un persona liber i íntegro, un persona limpi di pensamentu i sinsero di kurason.  Di boluntat fuerte, responsabel i ku konfiansa den su mes.  Ku a skohe un propósito pa su bida i ku ta fiel na su palabranan.

Di sigui lucha i traha pa e baranka aki por sigui bria riba e mundu aki.

Sali na defensa di nos hóbennan, i krea lidernan nobo pa duna speransa na nos komunidat.

Di ta inovativo den tur loke mi hasi, i sòru pa tur ku mester di e sosten.

Siendo un persona kreativo, ku ta trata di laga mundu atras. mihó ku el a bin hañ’é. Ku ta kuida e integridat di naturalesa siñando kontinuamente.  Buskando terenonan no eksplorá ku ta hasi su trabou korekto, i ku ta liber di gana di kos, independiente di kosnan material.

Mi ta primintí di laga positivismo biba semper den mi, i tur ku rondonámi.

Pa sigui lucha ku nos pueblo i mantené fe pa logra viktoria ku trabou den tur tempu!

Duna di mi parti p’e isla prosperá. Uni forsa, p’asina triunfá.

Demostrá na mi patria onor i lealtat, meskos na e bandera e union di nos nashon.

Berdaderamente nos bida lo ta poko pa duna nos pais, pero luchando uni pa libertat, amor i komprenshon.

Mi lo sòru pa ora mi ta leu fo’i kas, mi rekòrdá tur ora riba bo mi Kòrsou, bo solo i playanan, e orguyo di nos tur.

Mi ta primintí di ta un persona spiritual, ku un sentido transedental di bida.  Ku ta habri su kurason pa Dios  Ku ta biba su fe ku alegria i hasié parti di su bida diario.  Ku ta habrí pa diálogo i ku komprenshon ta respetá religion di otro.

 Di ta un persona kla pa yuda otro, aktivo den nos komunidat. Defensor di derechi di otro hende, komprometé mi mes ku demokrasia i metí den nos desaroyo.  Amante di hustisia i promotor di pas.  Ku ta duna balor na trabou di hende, ku ta forma famia basá riba amor.  Ku ta konsiente di su dignidat i esun di otro, i ku alegria i kariño ta kompartí ku tur hende.

Mi ta primintí di sigui ku e lucha pa libertat i emansipashon.

Esaki ta mi promesa pa bo mi pais Kòrsou, paso nos Kreadó a hasimi digno di ta Yu di  Kòrsou!

Komparti kumi bo promesa pa..